Նիդերլանդներն որոշել է չմասնակցել 2027 թվականի «Եվրատեսիլ» երգի մրցույթին։ Երկրի հանրային հեռարձակող NPO-ն որոշումը պայմանավորել է Իսրայելի մասնակցության շուրջ շարունակվող վեճերով և հոլանդական հասարակության մեջ առաջացած պառակտմամբ։
NPO-ի մեդիա տնօրեն Յուրե Բոսմանը հոկտեմբերի 27-ին հայտարարել է, որ Իսրայելի մասնակցության հարցը շարունակում է լուրջ տարաձայնություններ առաջացնել Նիդերլանդներում։ Հեռարձակողի ղեկավարությունը, խորհրդակցելով վերահսկիչ խորհրդի հետ, որոշել է 2027 թվականին մրցույթին մասնակից չուղարկել։
NPO-ի նախագահ Ջեթ դե Ռանիցի խոսքով՝ այս պահին Նիդերլանդների վերադարձը մրցույթ վաղաժամ է։ Նա ընդգծել է, որ Իսրայելի մասնակցության շուրջ քննարկումները շարունակում են բևեռացնել հասարակությանը։
Նիդերլանդները միացել է այն երկրներին, որոնք հրաժարվել են մասնակցել մրցույթին՝ Իսրայելի մասնակցության պատճառով։ Իռլանդիան ևս հայտարարել է 2027 թվականի մրցույթին չմասնակցելու մտադրության մասին, իսկ Իսպանիայում բոյկոտի հարցը շարունակում է քննարկվել։ Չեխիայի հեռարձակողը հրաժարվել է մասնակցությունից՝ ֆինանսական պատճառներով։
«Եվրատեսիլը» կազմակերպող Եվրոպական հեռարձակողների միությունը (EBU) մրցույթի կանոններով ընդգծում է քաղաքական չեզոքության կարևորությունը։ Իսրայելի մասնակցության շուրջ տարաձայնությունները, սակայն, շարունակում են լարվածություն առաջացնել մասնակից երկրների հեռարձակողների շրջանում։
2027 թվականի «Եվրատեսիլ» երգի մրցույթը կանցկացվի մայիսին՝ Բուլղարիայի Բուրգաս քաղաքում։ Բուլղարիան մրցույթը հյուրընկալելու իրավունք է ստացել 2026 թվականին Դարայի «Bangaranga» երգով մրցույթը հաղթելուց հետո։