Թուրքիայի Անթալիա քաղաքում, որտեղ անցկացվում է ՄԱԿ կլիմայական COP31 գագաթնաժողովը, ԼԳԲՏ համայնքի ներկայացուցիչները մասնակցել են շրջակա միջավայրի պաշտպանության միջազգային երթին՝ չնայած Թուրքիայում համայնքի ներկայացուցիչների նկատմամբ ճնշումների ուժեղացմանը, հայտնել է The Guardian-ը։
Ակցիայի կազմակերպիչները նախապես պատրաստել էին ծիածանագույն դրոշներ, սակայն թույլ են տվել դրանք բացել միայն այն բանից հետո, երբ երթի մասնակիցներն ու միջազգային կազմակերպությունների ներկայացուցիչները շրջապատել են ակտիվիստներին։
Շաբաթ օրն անցկացված ակցիայի ընթացքում իրավապահ մարմիններն անվտանգության լայնածավալ միջոցառումներ են իրականացրել։ Այդըն Քյանզա զբոսայգու մուտքի մոտ մասնակիցներին երկու անգամ խուզարկել են, ստուգել նրանց պայուսակներն ու պաստառները, երթի երթուղին առանձնացրել են մետաղական պատնեշներով։
Երթին մասնակցել են հազարավոր մարդիկ տարբեր երկրներից։ Նրանք հանդես են եկել հանուն կլիմայական արդարության, անտառների ու գյուղերի պաշտպանության, ինչպես նաև կառավարություններից պահանջել են շրջակա միջավայրի աղտոտման պատասխանատվությունը դնել խոշորագույն աղտոտողների վրա։ Կարգախոսների թվում հնչել են գլոբալ տաքացումը Ցելսիուսի 1,5 աստիճանի սահմաններում պահելու նպատակը պահպանելու կոչեր։
Մասնակիցները նաև ուշադրություն են հրավիրել իրենց երկրներում առկա բնապահպանական խնդիրների վրա։ Մասնավորապես, Ինդոնեզիայի ներկայացուցիչները խոսել են շարունակվող անտառային և հողատարածքների հրդեհների մասին, որոնց հետևանքները սպառնում են բնակչության առողջությանը։
Ակցիան անցկացվել է COP31-ի բանակցություններում սահմանափակ առաջընթացի ֆոնին։ Կլիմայի հարցերով ՄԱԿ գլխավոր բանակցող Սայմոն Սթիլը երկրներին կոչ է արել ավելի արագ անցնել ամենաբարդ հարցերի քննարկմանը և զգուշացրել է, որ առանց մասնակիցների միջև փոխզիջումների չի հաջողվի ընդհանուր արդյունքի հասնել։