2026 թվականի երկրորդ եռամսյակում Հայաստանում անշարժ գույքի գների աճը վերականգնվել է։ Այս մասին լրագրողների հետ հանդիպման ժամանակ հայտնել է ՀՀ Կենտրոնական բանկի նախագահի տեղակալ Հովհաննես Խաչատրյանը։
«Վերջին մեկ-մեկուկես տարվա ընթացքում անշարժ գույքի գների աճը կանգ էր առել և զգալիորեն դանդաղել, սակայն երկրորդ եռամսյակում արդեն նկատում ենք ակտիվացում»,- նշել է ԿԲ փոխնախագահը։
Հովհաննես Խաչատրյանի փոխանցմամբ՝ դեռևս վերջնական հստակեցված չէ, թե այս միտումը որքանով է պայմանավորված գնման պայմանների փոփոխությամբ, սակայն հիփոթեքային գործարքների ծավալը շարունակում է բարձր մնալ։
Բացի այդ, ակտիվություն է նկատվում նաև ոչ ռեզիդենտների (օտարերկրացիների կամ արտերկրում բնակվողների) կողմից իրականացվող գնումներում։
«Հավանաբար ձևավորվում է նոր միտում, երբ կառուցապատողները, բնակարանների վաճառքն ապահովելու նպատակով, սկսում են ավելի ակտիվորեն թիրախավորել հենց ոչ ռեզիդենտ գնորդներին»,- ընդգծել է Կենտրոնական բանկի ներկայացուցիչը։