Համացանցում զգացմունքային հրապարակումները և կարծիքները կարող են միաժամանակ ազդել մարդկանց վերաբերմունքի վրա թե՛ ապրանքի, թե՛ հաղորդագրության հեղինակի նկատմամբ և նույնիսկ փոխանցել նրանց սեփական հուզական վիճակը։ Այս եզրակացությանն են եկել Հարավային Ֆլորիդայի համալսարանի հետազոտողները՝ առաջարկելով համացանցում զգացմունքային բովանդակության ազդեցության նոր տեսություն։
Հետազոտությունը, որի արդյունքները հրապարակվել են MIS Quarterly ամսագրում, նկարագրում է երեք հիմնական հոգեբանական արձագանք, որոնք կարող է առաջացնել զգացմունքային գրառումը կամ կարծիքը։ Օգտատերը կարող է կարծիք ձևավորել հենց ապրանքի, վայրի կամ գաղափարի մասին, գնահատել հաղորդագրության հեղինակի անձը և միաժամանակ ապրել նմանատիպ հույզ՝ այսպես կոչված հուզական վարակում։
Հետազոտության գլխավոր հեղինակի՝ Հարավային Ֆլորիդայի համալսարանի պրոֆեսոր Դեչժի Ինի խոսքով, այս արձագանքների տարանջատումն օգնում է բացատրել, թե ինչու է համացանցում զգացմունքային բովանդակությունն այդքան ազդեցիկ և ինչու դրա ազդեցությունը միշտ չէ, որ միանշանակ է։
Օրինակ՝ բացասական և զայրույթով լի կարծիքը կարող է նվազեցնել վստահությունը դրա հեղինակի նկատմամբ, ինչի պատճառով ընթերցողը կարող է ավելի քիչ հաշվի առնել նրա կարծիքը։ Սակայն միևնույն ժամանակ հաղորդագրության զգացմունքային երանգավորումը կարող է օգտատիրոջ մոտ ձևավորել բացասական վերաբերմունք հենց ապրանքի նկատմամբ։
Այսպիսով, նույն հրապարակումը կարող է միաժամանակ և՛ ուժեղացնել, և՛ թուլացնել հետաքրքրությունը ապրանքի կամ ապրանքանիշի նկատմամբ։ Հետազոտողները կարծում են, որ իրենց առաջարկած մոդելը կօգնի ավելի լավ գնահատել զգացմունքային բովանդակության ազդեցությունը օգտատերերի վարքագծի վրա և կարող է օգտակար լինել գիտնականների, առցանց հարթակների մշակողների, մարքեթոլոգների և կարգավորողների համար։