Category: News.am

«Վերջին զանգի» միջոցառումների անվտանգությունն ապահովելու նպատակով ՆԳՆ ոստիկանությունը հանրապետության ողջ տարածքում իրականացնում է ուժեղացված ծառայություն:

Ըստ ՆԳՆ ոստիկանության՝ մայիսի 22-ի ժամը 13:00-ի դրությամբ պահպանվող հատուկ տարածքներ է տեղափոխվել միջոցառման մասնակից 49 տրանսպորտային միջոց, որոնցից 27-ի ղեկին եղել են անչափահասներ։ 

«Եվս մեկ անգամ հորդորում ենք` միջոցառումների անվտանգությունն ապահովելու նպատակով տրանսպորտային միջոցները չվստահել անչափահասներին»,- ասվում է հաղորդագրությունում։

Հայաստանի վարչապետ Նիկոլ Փաշինյանի՝ Եվրասիական տնտեսական միությունում (ԵԱՏՄ) մնալու ցանկությունը փորձ է շարունակելու օգտագործել եվրասիական տարածքը ֆինանսական նպատակներով, հայտարարել է Պետդումայի նախագահ Վյաչեսլավ Վոլոդինը։

«Փաշինյանի՝ ԵԱՏՄ-ում մնալու ցանկությունը ցանկությունը փորձ է շարունակելու օգտագործել եվրասիական տարածքը ֆինանսական նպատակներով, ինչը Հայաստանին արդեն տվել է ՀՆԱ-ի 2,5 անգամ աճ», – գրել է նա «Մաքս» հարթակի իր ալիքում։

Վոլոդինի խոսքով՝ քաղաքական առումով Փաշինյանն արդեն բոլոր որոշումները կայացրել է։

ԱՄՆ վարչակազմը Իրանի շուրջ իրավիճակի վերաբերյալ բանակցություններում արձանագրում է փոքր առաջընթաց։ Այդ մասին հայտարարել է ԱՄՆ պետքարտուղար Մարկո Ռուբիոն Հելսինգբորգ քաղաքում, որտեղ կանցկացվի ՆԱՏՕ-ի անդամ երկրների արտաքին քաղաքական գերատեսչությունների ղեկավարների հանդիպումը։

«Ինչ վերաբերում է Իրանին, ապա մենք սպասում ենք ներկայումս ընթացող բանակցությունների վերաբերյալ հաղորդումներին։ Նշմարվում է փոքր առաջընթաց։ Ես չեմ ուզում չափազանցնել, սակայն փոքր տեղաշարժ կա, և դա լավ է։ Հիմնական սկզբունքները մնում են անփոփոխ։ Իրանը չպետք է ունենա միջուկային զենք, դա պարզապես անթույլատրելի է։ [Թեհրանը] երբեք չպետք է ստանա միջուկային զենք, և այդ նպատակին հասնելու համար մենք ստիպված կլինենք լուծել ուրանի հարստացման հարցը։ Մենք ստիպված կլինենք լուծել բարձր հարստացված ուրանի հարցը», – ասել է ամերիկյան դիվանագիտության ղեկավարը ՆԱՏՕ-ի գլխավոր քարտուղար Մարկ Ռյուտեի հետ զրույցից հետո։

Այսպես կոչված «անկլավների» թեման երբեք օրակարգում չի եղել և ձևավորվել է «զրոյից»։ Այս հարցը քննարկելու պատրաստակամություն են դրսևորել մարդիկ, ովքեր ներքուստ արդեն հաշտվել են միակողմանի զիջումների հեռանկարի հետ և փորձում են նույն մոտեցումը պարտադրել ամբողջ հայկական հասարակությանը։ Այս մասին այսօր՝ մայիսի 22-ին, մամուլի ասուլիսի ժամանակ հայտնել է «Միասնության թևեր» կուսակցության առաջնորդ, նույն կուսակցության վարչապետի թեկնածու Արման Թաթոյանը։

«Միասնության թևերի» առաջնորդը հայտնել է, որ իր համար այսպես կոչված «անկլավների» հարց գոյություն չունի, քանի որ գլխավոր առաջնահերթություն է համարում Հայաստանի և հայ ժողովրդի անվտանգությունը։ Թաթոյանն ընդգծել է, որ բազմիցս եղել է ինչպես Տավուշի մարզում, այնպես էլ Տիգրանաշենում, լավ պատկերացնում է տեղանքի աշխարհագրությունն ու իշխանությունների ծրագրերի հնարավոր իրականացման հետևանքները։ Նրա խոսքով՝ գործող իշխանության նշած տարածքների հանձնումը կհանգեցնի երկրի անվտանգության համակարգի լիակատար փլուզման, բնակավայրերի մեկուսացման և հայկական գյուղերի, արոտավայրերի ու ռազմավարական օբյեկտների՝ գազատարների, ինտերնետ-հաղորդակցությունների և ռազմավարական նշանակության այլ ենթակառուցվածքների նկատմամբ Ադրբեջանի վերահսկողության ուժեղացմանը։

Ընդդիմադիր գործիչը քննադատել է Արծվաշենի վերադարձի հեռանկարների վերաբերյալ իշխանության հայտարարությունները։ Թաթոյանը նշել է, որ անվտանգության տեսանկյունից այդ տարածքն ինքնին բարդություններ է ստեղծում Հայաստանի համար, քանի որ գտնվում է ադրբեջանական ուժերի շրջափակման մեջ։ Նրա խոսքով՝ Ադրբեջանը պատրաստ կլիներ Հայաստանին առաջարկել «ևս մի քանի Արծվաշեն»՝ փոխարենը ստանալու այն տարածքները, որոնք Բաքուն հիմա ձգտում է ձեռք բերել։ Թաթոյանը համոզված է, որ Ադրբեջանին պետք են հենց այդ հատվածները, քանի որ դրանք հնարավորություն են տալիս քանդել մեր երկրի անվտանգության համակարգը։

Թաթոյանը կարծում է, որ իշխանությունները հասարակությանը պարտադրում են զիջումների և պարտության հետ հաշտվելու տրամաբանություն, մինչդեռ ինքն առաջարկում է առաջնորդվել բացառապես անվտանգության և բնակչության պաշտպանության շահերով։

Առանձին անդրադառնալով Տիգրանաշենին՝ նա ընդգծել է, որ դա Հայաստանի պատմական տարածք է և հայկական գյուղ։ Թաթոյանը հիշեցրել է, որ նախկինում արդեն ներկայացրել էր Տիգրանաշենի՝ Հայաստանին պատկանելու պատմական և ստուգաբանական հիմնավորումները։ Նրա խոսքով՝ Տիգրանաշենով անցնող ճանապարհը ռազմավարական նշանակություն ունի, քանի որ Սյունիքն ու Վայոց ձորը կապում է երկրի մնացած հատվածի հետ։ Միաժամանակ, նա քննադատել է այլընտրանքային ճանապարհ կառուցելու հնարավորության մասին իշխանությունների հայտարարությունները։

Թաթոյանը նաև հայտնել է, որ այսպես կոչված «անկլավների» շուրջ գործընթացները հնարավոր է կանգնեցնել, քանի որ, իր խոսքով, այդ թեման արհեստականորեն է ստեղծվել և նախկինում երբեք չի հայտնվել միջազգային օրակարգում կամ դիվանագիտական քննարկումներում։ Նա նշել է, որ Եվրոպական դատարանում Հայաստանի ներկայացուցչի տեղակալի պաշտոնում աշխատելու ընթացքում քննվել են Արծվաշենի հետ կապված գործեր, սակայն ներկայիս տարածքների հարցը երբեք չի բարձրացվել։

Թաթոյանի խոսքով՝ գործող իշխանությունը միայն խոսում է «անկլավային տարածքները հանձնելու» և պարտության հետ հաշտվելու անհրաժեշտության մասին, մինչդեռ ինքը կողմ է սխալների շտկմանը, քաղաքացիների պաշտպանությանը և խնդրի վերջնական լուծմանը՝ մասնագիտական մոտեցման, միջազգային դիվանագիտության և իրավական մեխանիզմների հիման վրա։

Թաթոյանն ընդգծել է, որ տարածքային հարցեր լուծելիս անվտանգությունը պետք է լինի գլխավոր չափանիշը։ Նրա խոսքով՝ նույնիսկ Հայաստանի հողին պատկանելությունը հաստատող կադաստրային փաստաթղթերի առկայությունն արդեն իսկ հայկական կողմի օգտին փաստարկ է, հատկապես եթե մարդիկ տասնամյակներ շարունակ օգտվել են այդ հողից, մշակել այն և ապրել են այնտեղ։

Թուրքիայում փակվել է Ստամբուլի Բիլգի համալսարանը (İstanbul Bilgi Üniversitesi), որը մտնում է Can Holding-ի կազմի մեջ։ Այս տեղեկությունը պաշտոնական փաստաթղթերին հղումով հրապարակել է Hurriyet թերթը։

Նշվում է, որ բուհի գործունեության լիցենզիան չեղարկելու որոշումը հաստատվել է նախագահ Ռեջեփ Թայիփ Էրդողանի կողմից։

Առկա տեղեկությունների համաձայն՝ համալսարանը զբաղեցնում է մոտ 210 000 քմ տարածք։ Ներկայումս համալսարանում սովորում է ավելի քան 20 000 ուսանող, շրջանավարտների թիվը գերազանցում է 70 000-ը, իսկ դասախոսներինը՝ 1 000-ը։

Բացի այդ, կրթական հաստատության կազմում են 8 ֆակուլտետ, 3 ինստիտուտ, 3 մասնագիտական բարձրագույն դպրոց և ավելի քան 150 ծրագիր, որոնք ուսանողներին կրթություն են տրամադրում կրտսեր բակալավրիատի, բակալավրիատի և մագիստրատուրայի մակարդակներում։

Milliyet պարբերականը հայտնում է, որ Բիլգիի ուսանողները կշարունակեն ուսումը Միմար Սինանի անվան գեղարվեստի համալսարանում, որը դարձել է նրանց կրթության ավարտը երաշխավորող պաշտոնական հաստատությունը։

Թուրքական օրենսդրության համաձայն՝ համալսարանի հիմնադրամի հոգաբարձու նշանակված հավատարմագրված ուսումնական հաստատությունը պարտադիր պետք է լինի պետական։

BBC-ի թուրքական ծառայությունը որոշումը կապում է Բիլգի համալսարանի սեփականատեր Can Holding ընկերության նկատմամբ իրականացվող հետաքննության հետ, որը կասկածվում է փողերի լվացման, հարկերից խուսափելու և կազմակերպված հանցավորության հետ կապերի մեջ։ Ընկերության ակտիվները սառեցվել են, նշանակվել է արտաքին կառավարիչ։

Ինձ ոչ ոք չի ուղարկել, ես նույնիսկ չեմ կարող նման պրոցես պատկերացնել։ Այս մասին հայտնել է տնային կալանքի տակ գտնվող, «Ուժեղ Հայաստան» կուսակցությունից վարչապետի թեկնածու, գործարար և բարերար Սամվել Կարապետյանը՝ հայկական լրատվամիջոցների խմբագիրների խմբի հետ հանդիպման ժամանակ։

«Չկա այն մարդը կամ ուժ, որ կարողանա ինձ ստիպել անել այն, ինչ ես չեմ ուզում։ Աշխարհում չկա այնպիսի բիզնես, որի համար ես Հայաստանի շահերը կդնեի հարվածի տակ։ Իրենք ի՞նչ կարող են անել, մի քանի ընկերություն խլե՞ն։ Փաշինյանն էլ փորձեց դա անել, հետո՞։ Գցեց իր ոտքի՞ն։ Նրանք էլ կգցեն իրենց ոտքին։ Ես վստահ եմ, որ դա չի լինելու, բայց եթե եղավ, ուրեմն եղավ։ Եթե ես որոշել եմ արդեն կյանքս նվիրել երկրի զարգացմանը, դա լինելու է գլխավոր նպատակ։ Ինձ ոչ ոք չի ուղարկել, ես նույնիսկ այդ պրոցեսը չեմ կարող պատկերացնել։

Ես կասկածում եմ, որ Փաշինյանն իրենց ամենաանիմաստ գործակալն է։ Միգուցե, բայց ես տեղյակ չեմ, պարզապես ենթադրում եմ։ Նրա քայլերը… Միգուցե Էֆէսբեի գործակալ չի, գուցե Ֆիդանի գործակալն է, ես չգիտեմ։ Բայց ինըք ինչ մեր հայրենիքիհանդեպ անում է, դա նորմալ մարդու քայլեր չեն կարող լինել։ Ինձ ոչ ոք չի ուղարկել, ինձ դա ստիպել է անել Փաշինյանը, երբ հարձակվել է մեր եկեղեցու վրա։ Բայց հստակ է, որ ՌԴ-ում ինձ հետ այդ թեմայով ոչ մի անգամ խոսակցություն չի եղել։ Եթե նման բան լիներ, Փաշինյանը չէր համարձակվի ինձ 5 ամիս ամենածանր պայմաններում պահել ԿԳԲ-ի նկուղներում», – նշել է Կարապետյանը։

Պատասխանելով այն հարցին, թե արդյոք իշխանությունները արտահոսքերի միջոցով չեն ծրագրում հող նախապատրաստել, որպեսզի Կարապետյանին չեզոքացնեն ընտրական գործընթացներից, քաղաքական գործիչը նկատել է, որ նման բան չի բացառվում, կամ ուժային կառույցները արջի ծառայություն են մատուցում Փաշինյանին։ Նրա խոսքով՝ «Ուժեղ Հայաստանի» շարքերում հազարավոր ակտիվիստների մեջ կարող են լինել ներթափանցված անձինք, նրանց էլ ձայնագրում են և ցուցադրաբար կալանավորում, բայց նրանց մեղավորության վերաբերյալ դատարանի ոչ մի որոշում չկա։

Կարապետյանի գնահատմամբ՝ իշխանությունները պատրաստ են իրենց ցանկացած ապօրինի քայլին։ «Բայց որքան էլ անուղեղ լինեն, չեն ուզենա լինել ոչ լեգիտիմ իշխանություն, իսկ այդպես կդառնան ոչ լեգիտիմ, ժողովուրդը դա թույլ չի տա։ Ինչպե՞ս կարող են իշխանությունը պահել բնակչության մեկ քառորդի աջակցությամբ, դա վտանգավոր կդառնա նրանց համար ոչ միայն որպես իշխանություն, այլև անձամբ յուրաքանչյուրի համար։ Եթե պրոցես սկսվի, մենք չենք կարող մեկնաբանել, թե այն ինչպես կավարտվի, աշխարհում շատ օրինակներ կան», – զգուշացրել է քաղաքական գործիչը։

Գազի հետ կապված ոչ մի խնդիր չկա, Նիկոլ Փաշինյանը միակ ղեկավարն է, ում օրոք գազի գինը չի թանկացել, մնացած բոլոր ղեկավարների օրոք, որոնք իբր թե մոտ են եղել Ռուսաստանի հետ, իրանց օրոք գազը թանկացել է։ Այս մասին այսօր՝ մայիսի 22–ին, Նոր Ն որքում ՔՊ քարոզարշավի ժամանակ լրագրողների հետ զրույցում նշեց էկոնոմիկայի նախարար Գևորգ Պապոյանը։

Անդրադառնալով նրան, որ Նիկոլ Փաշինյանը մեղադրում է արցախցիներին, որ պատերազմում չեն զոհվել կամ չեն վիրավորվել, Պապոյանն ասաց. «Այդ դրվագը հետևյալ մարդկանց մասին է: Պատերազմը սկսելուց անմիջապես հետո ղարաբաղյան էլիտան, որն ամենաշատն է թալանել Ղարաբաղի ժողովրդին, նստել է ջիպերը և փախել է, եկել է Հայաստանի Հանրապետություն։ Թանկարժեք ջիպերի տասնյակ կիլոմետրերով կալոնա է եղել, այդտեղ չի եղել որևէ 06, եղել է ջիպերի կալոնա։ Դրանք փախել, եկել են այստեղ, կաֆեներում նստել են, ժողովրդին ու մեր զինվորներին թողել են այնտեղ մենակ, ու այսօր հենց դրանց նկատի ունի Նիկոլ Փաշինյանը Հիմա էլի ասում են՝ մենք նստենք Երևանում կաֆեներում, մեր ջիպերի մեջ, թող այս երեխեքը էլի գնան զոհվեն։ Դու ի՞նչ բարոյական իրավունք ունես, դու ո՞վ ես, այ պիղծ, դու ո՞վ ես, որ փախնես ու մյուսներին ասես՝ ինչու չեք զոհվում»։

Պապոյանը հայտարարեց. «Մենք կլինենք՝ կինի խաղաղություն, դրանք կգան՝ կլինի պատերազմ։ Դրա երաշխիքն այն է, որ 2.5 տարի է Հայաստանի սահմաններին կրակոց չկա։ Միայն խաղաղության ժամանակ է, որ հնարավոր է բոլոր հարցերը լուծել, այդ թվում գերիների։ Նրանք, ովքեր հակառակն են ասում, իրենք ընդամենը գերեզմանների թիվը ուզում են շատացնել, որովհետև մենակ այդ գերեզմանների թիվը շատացնելով է հնարավոր նոր ջիպեր առնել, Հյուսիսային պողոտայում նոր տներ առնել, Կասկադում նոր կաֆեներ առնել։

Մենք ասում ենք չէ, չի լինելու, հերիք եղավ, 30 տարի կերաք էս ժողովրդին, մեղք չի՞ էս ժողովուրդը»։

Ինչ վերաբերում է քննադատությանը, որ ՔՊ–ականներն էլ պատերազմի ժամանակ չեն մեկնել ռազմաճակատ ու չեն զոհվել, Պապոյանն ասաց. Նիկոլ Փաշինյանի որդու կողքը մեջք մեջքի նստած զինվորը խրամատում զոհվել է։ Այսինքն երազում եք, որ 10 սանտիմետր այս կողմ կպնե՞ր։ Այդ մարդիկ դա են ուզում։ Նիկոլ Փաշինյանը իր տղային ուղարկել է ամենավտանգավոր տեղը։

Մենք ասում ենք, չպիտի ոչ մեկ զոհվի, իրենք ասում են  ՝ մենք պիտի նստենք Կասկադի կաֆեում կոֆե խմենք, նստենք ջիպը, մյուսները գնան զոհվեն։ Դրա համար ստանալու են պատասխան, հեսա անցողիկ շեմը չեն հաղթահարելու, ու կտեսնենք, թե մենք ինչքան ձայն ենք տանելու»։

Ինչ վերաբերում է ՌԴ Անվտանգության խորհրդի քարտուղար Սերգեյ Շոյգույի հայտարարությանը, որ Հայաստանը ձեռնարկել է մի շարք գործողություններ, որոնք Մոսկվան դիտարկում է որպես ոչ բարեկամական, Պապոյանն ասաց. «Ռուսաստանի առանձին պաշտոնյաներ միշտ էլ երբեմն արել են հայտարարություններ, որոնք չեն բխում հայ-ռուսական դաշնակցային հարաբերությունների կարգավիճակից և Հայաստանի և Ռուսաստանի ղեկավարների հարաբերությունների մակարդակից և նրանց խոսակցության բովանդակությունից»։