Month: April 2026

«Գազպրոմ Արմենիա» ընկերությունից հայտնում են, որ պլանային աշխատանքներ իրականացնելու նպատակով՝ ապրիլի 28-ին ժամը 10:00-ից մինչև ժամը 18:00-ն, կդադարեցվի Կոտայքի մարզի Հրազդան քաղաքի Միկրոշրջան թաղամասի գազասպառողների գազամատակարարումը։

Չինական խոշորագույն անկախ վերամշակողներից մեկի՝ «Hengli Petrochemical» ընկերության բաժնետոմսերի արժեքն այսօր նվազել է 10%-ով՝ ԱՄՆ-ի կողմից սահմանված նոր պատժամիջոցների պատճառով։

Վաշինգտոնը ընկերությանը մեղադրում է Իրանից միլիարդավոր դոլարների հում նավթ և նավթամթերք գնելու մեջ՝ նրան անվանելով Թեհրանի խոշորագույն հաճախորդներից մեկը։

Թեև չինական ընկերությունը հերքում է որևէ առնչություն Իրանի հետ, իսկ Պեկինը դատապարտում է ԱՄՆ-ի «ապօրինի միակողմանի պատժամիջոցները»՝ կոչ անելով դադարեցնել առևտրի քաղաքականացումը, շուկան բացասաբար է արձագանքել այս լարվածությանը։

ՀՀ կրթության, գիտության, մշակույթի և սպորտի նախարարության հովանու ներքո Պարի միջազգային օրը՝ ապրիլի 29-ին, Ժողովրդական երաժշտության և պարի ազգային կենտրոնը հանդես կգա «Արի՛, պարի՛» տոնական նախաձեռնությամբ, որի շրջանակում կանցկացվեն մի շարք միջոցառումներ։
Պարի միջազգային օրվան նվիրված լայնամասշտաբ հանրային մշակութային իրադարձությունը կմիավորի շուրջ 4000 պարողների՝

• Ժողովրդական երաժշտության և պարի ազգային կենտրոնի կազմում գործող պետական պարային ստուդիաներից,
• Վանուշ Խանամիրյանի անվան Հայաստանի պարարվեստի գործիչների միությունից,
• Հայաստանի պարարվեստի ազգային միության կազմում գործող խմբերից,
• հանրաճանաչ պարային խմբերից,
• ՀՀ բարձրագույն և միջին մասնագիտական ուսումնական հաստատություններից,
• ՀՀ մարզերում գործող պարային խմբերից:

Միջոցառման նպատակն է հանրայնացնել հայկական պարարվեստը, ընդգծել դրա կենսունակությունն ու նշանակալիությունը, ինչպես նաև ապահովել հասարակության լայն շերտերի ակտիվ մասնակցությունն ազգային պարարվեստի ժառանգության պահպանման ու արժևորման գործում։ Այս մասին տեղեկացնում են ԿԳՄՍՆ-ից:

Պարի միջազգային օրվա միջոցառումները կանցկացվեն մայրաքաղաքի կենտրոնում․

• ժամը 16:00-ին Հանրապետության հրապարակում կմեկնարկի «Տոնական շուրջպար 7 շրջանով» խորագիրը կրող միջոցառումը, որը կազդարարի տոնական օրվա ծրագրի մեկնարկը.
• ժամը 18:00-ին` Հյուսիսային պողոտայում, Շառլ Ազնավուրի անվան հրապարակում, ԿԳՄՍ նախարարության բակում, Ալեքսանդր Սպենդիարյանի տուն-թանգարանի հարակից տարածքում միաժամանակ կմեկնարկեն պարային ֆլեշմոբեր.
• ժամը 19:00-ին` Ազատության հրապարակում կազդարարվի տոնական օրվա միջոցառումների ավարտը:

ԿԳՄՍ նախարարությունը և Ժողովրդական երաժշտության և պարի ազգային կենտրոնը հրավիրում են բոլորին՝ միանալու տոնին և մասնակցելու «Արի՛, պարի՛» նախաձեռնությանը՝ դառնալով հայկական պարի կրողն ու տարածողը։