Ֆրանսիան, Գերմանիան, Մեծ Բրիտանիան և Իտալիան հինգշաբթի օրը դատապարտել են օկուպացված Հորդանան գետի Արևմտյան ափին E1 նախագծի շրջանակում բնակելի շենքերի կառուցման տենդերներ հայտարարելու Իսրայելի ծրագրերը, հայտնում է Reuters-ը:
«Բնակեցման E1 նախագծի շրջանակում շինարարական ծրագրերի տենդերային առաջարկներ հրապարակելու վերաբերյալ Իսրայելի որոշումն անընդունելի է», — ասված է չորս երկրների ղեկավարների համատեղ հայտարարության մեջ:
E1 նախագիծը նոր բնակելի թաղամասի կառուցում է նախատեսում Արևելյան Երուսաղեմի և Մաալե Ադումիմ բնակավայրի միջև: Դրա իրականացումն առանձնահատուկ մտահոգություն է առաջացնում պաղեստինցիների և մի շարք երկրների մոտ, քանի որ կարող է փաստացի երկու մասի բաժանել Արևմտյան ափի հյուսիսային և հարավային հատվածները:
1967 թվականի պատերազմի հետևանքով Իսրայելի վերահսկողության տակ անցած տարածքում միլիոնավոր պաղեստինցիների կողքին բնակվում են հարյուր հազարավոր իսրայելցի բնակիչներ:
Աշխարհի երկրների մեծ մասը և ՄԱԿ-ի մի շարք կառույցներ իսրայելական բնակավայրերը համարում են միջազգային իրավունքի խախտում, սակայն Իսրայելը չի ընդունում այս դիրքորոշումը՝ վկայակոչելով այդ տարածքի հետ պատմական և աստվածաշնչյան կապերը: