Author: Julbaz

Երևանի Հալաբյան փողոցի 13 շենքի խաղահրապարակի մոտ երեկ հայտնաբերված նորածնի կյանքին վտանգ չի սպառնում։ Նա CPAP-սարքի միջոցով է շնչում։ Առողջական վիճակը բավարար է։ Այս մասին NEWS.am—ին հայտնել են Առողջապահության նախարարությունից։

Հիշեցնենք, որ օգոստոսի 10-ին՝ ժամը 20.43-ին, ՆԳՆ օպերատիվ կառավարման կենտրոն ահազանգ է ստացվել, որ Երևանի Հալաբյան փողոցի 13 շենքի մոտ շորի մեջ փաթաթված նորածին երեխա կա։ Ոստիկանների օպերատիվ գործողությունների շնորհիվ նորածինն արագ տեղափոխվել է բժշկական կենտրոն։

Նորածինը հայտնաբերվել է խաղահրապարակում՝ երկաթե թիթեղների տակ։

Իսրայելցի և ամերիկացի պաշտոնյաների տվյալներով՝ Ատոմային էներգիայի միջազգային գործակալությունը (ՄԱԳԱՏԷ) շուտով դուրս կբերի Սիրիայի գաղտնի օբյեկտում պահվող միջուկային նյութերը այն բանից հետո, երբ Թրամփի վարչակազմը փոխըմբռնման է հասել Սիրիայի և Իսրայելի հետ։ Այս մասին հայտնում է Axios-ը։

Թրամփի վարչակազմը և ՄԱԳԱՏԷ-ն շտապ փորձում էին հասնել դիվանագիտական համաձայնության՝ ապահովելու նյութերի անվտանգ պահպանումը և կանխելու հակամարտության սրացումը Իսրայելի, Սիրիայի և, հնարավոր է, նույնիսկ Թուրքիայի մասնակցությամբ՝ այս զգայուն օբյեկտի պատճառով։

Գաղտնի օբյեկտի շուրջ ամիսներ շարունակված դրամատիկ կուլիսային սպառնալիքների փոխանակումն ու դիվանագիտական բանակցությունները, որոնք ավարտվեցին մի քանի շաբաթ առաջ ձեռք բերված համաձայնությամբ, գաղտնի էին պահվում և նախկինում չէին լուսաբանվել ԶԼՄ-ներում։

Ասադի իշխանությունները մշակել էին գաղտնի միջուկային ծրագիր, որի հիմքում ընկած էր Ալ-Քիբարում գտնվող գաղտնի ռեակտորը։

2007 թվականին Իսրայելի կողմից ռեակտորի ռմբակոծումից հետո Սիրիայի միջուկային ծրագիրը հիմնականում ոչնչացվել էր։ Սակայն մի շարք գիտահետազոտական և փորձակոնստրուկտորական օբյեկտներ, ինչպես նաև պահեստարաններ պահպանվել էին և հիմնականում չէին օգտագործվում։

Սիրիայում իշխանափոխությունից հետո ՄԱԳԱՏԷ-ն համաձայնագիր է ստորագրել նոր սիրիական կառավարության հետ, որը նրան թույլ է տվել այցելել Ալ-Քիբարի ռեակտոր և միջուկային գործունեության հետ կապված մի շարք այլ օբյեկտներ։

Իսրայելցի երկու պաշտոնյաների խոսքով՝ Ասադը «Օբյեկտ 99»-ում պահում էր միջուկային նյութեր, որոնք Ալ-Քիբարում միջուկային ռեակտորի կառուցման նախագծի մաս էին կազմում։

Թեև այդ օբյեկտում գտնվող նյութերը չեն կարող օգտագործվել միջուկային զենք ստեղծելու համար, դրանք կարելի է օգտագործել «կեղտոտ ռումբ» պատրաստելու համար՝ սովորական պայթուցիկ սարք, որը տարածքի աղտոտման նպատակով ցրում է ռադիոակտիվ նյութեր, այլ ոչ թե առաջացնում միջուկային պայթյուն։

Մարզի ղեկավարի պաշտոնում աշխատելու ընթացքում ես որևէ հանդիպում չեմ անցկացրել գործարար և «Բարգավաճ Հայաստան» կուսակցության առաջնորդ Գագիկ Ծառուկյանի հետ։ Այս մասին օգոստոսի 11-ին խորհրդարանում «Հայաստանի լուրեր – NEWS.am»-ի թղթակցի հետ զրույցում հայտարարել է Կոտայքի մարզի նախկին մարզպետ, «Քաղաքացիական պայմանագիր» կուսակցությունից պատգամավոր Աղարոն Սահակյանը։

Մեկնաբանելով ԶԼՄ-ների հաղորդումները Կոտայքի մարզում «թեժ պայքարի» և քաղաքական լարվածության մասին՝ կապված «Բարգավաճ Հայաստան» կուսակցության առաջնորդի կալանքի հետ, Սահակյանը նախընտրել է խուսափել մանրամասներից։ «Ի՞նչ իրավիճակ։ Ես չգիտեմ, թե ինչի մասին եք խոսում»,- հավելել է պատգամավորը, որից հետո ընդհատել է զրույցը։

Հիշեցնենք, որ Գագիկ Ծառուկյանը արդեն մեկ ամիս է՝ կալանքի տակ է՝ շորթման, խարդախության և փողերի լվացման վերաբերյալ քրեական գործերի շրջանակում։

Այսօր, ինչպես ինձ է թվում, անհրաժեշտ է արձանագրել, որ մեր երկրում այս հայեցակարգի իրականացման ուղղությամբ բավարար չափով տեսանելի և շոշափելի աշխատանք չի կատարվել։ Այդ մասին օգոստոսի 11-ին Ազգային ժողովի նիստում, պաշտպանության և անվտանգության հարցերի մշտական խորհրդարանական հանձնաժողովի նախագահի ընտրության հարցի քննարկման ժամանակ, հայտարարեց ընդդիմադիր «Ուժեղ Հայաստան» խմբակցության պատգամավոր Վաղինակ Վարդանյանը՝ անդրադառնալով երկու տարի առաջ ընդունված «Համապարփակ պաշտպանության և անվտանգության հայեցակարգին», որը հանրային ընկալման մեջ առավել հայտնի է որպես «Ազգ-բանակ» գաղափար։

Նա նշեց, որ բազմաթիվ առաջատար պետություններ նախկինում բախվել են այնպիսի աշխարհաքաղաքական մարտահրավերների, ինչպիսիք այսօր կանգնած են Հայաստանի առջև, և կարողացել են հաղթահարել դրանք՝ այս հայեցակարգի ներդրման միջոցով։

«Վիլեն Գաբրիելյանը (իշխող կուսակցության կողմից հանձնաժողովի նախագահի պաշտոնի թեկնածու – խմբ.) իր ելույթում նույնպես նշեց, որ այս հայեցակարգն ընդունվել է, և դրա իրականացման վերաբերյալ գոյություն ունեն պաշտպանության նախարարի համապատասխան հրամաններ։ Սակայն պաշտպանության ոլորտում փաստաթուղթը ինքնանպատակ չէ։ Այն նշանակություն ունի միայն այն ժամանակ, երբ վերածվում է գործնական քայլերի, ինստիտուցիոնալ փոփոխությունների և պաշտպանունակության բարձրացման», – ասաց պատգամավորը։

Հայտարարելով, որ «մենք արդեն տեսել ենք, թե ինչ հետևանքների է հանգեցնում այն իրավիճակը, երբ նման որոշումները մնում են միայն թղթի վրա», Վարդանյանը նշեց.

«Վերջին տարիներին Հայաստանը կրել է ծանր կորուստներ, և այս փորձը պարտավորեցնում է մեզ այլևս չսահմանափակվել օրենքների, որոշումների և հրամանների ձևական ընդունմամբ։ Մեզ անհրաժեշտ են տեսանելի, չափելի և գործնական արդյունքներ»։

Ընդդիմադիր պատգամավորը նշեց, որ Հայաստանը խորհրդարանական հանրապետություն է և պետք է իրականացնի այս ոլորտի վերահսկումն ու կարգավորումը։

«Մենք այլևս սխալվելու իրավունք չունենք. դա կարող է մեզ համար ճակատագրական լինել», – հավելեց Վագինակ Վարդանյանը՝ առանձնահատուկ ընդգծելով Հայաստանի Հանրապետության ռազմավարական խորության գործոնը և նրա աշխարհաքաղաքական դիրքը։