Category: TopNews.am

Հունգարիայի խորհրդարանի ընտրությունում հաղթած «Տիսա» կուսակցության 45-ամյա առաջնորդ Պետեր Մադյարը Բուդապեշտում ելույթ է ունեցել տասնյակ հազարավոր ցնծացող կողմնակիցների առջև և հայտարարել «կառավարելու պատմական մանդատի» մասին:

Մադյարը խոստացել է ներկայացնել «բոլոր հունգարացիների, այդ թվում՝ արտերկրում բնակվողների շահերը»: Առաջնորդի ելույթը ժամանակ առ ժամանակ ընդհատվել է հավաքվածների բացականչություններով, որոնք վանկարկել են՝ Եվրոպա՛, Եվրոպա՛:

Ընտրական հանձնաժողովի տվյալներով՝ ընտրատեղամասերի 98%-ում ձայների հաշվարկից հետո Մադյարը և կենտրոնամետ «Տիսա» կուսակցությունը ստացել է խորհրդարանի 199 տեղից 138-ը՝ ձայների երկու երրորդից ավելին: Դա սահմանադրական մեծամասնություն է, որը նրա կառավարությանը մեծ հնարավորություն կտա կատարելու կարևոր օրենսդրական փոփոխություններ ու իրականացնելու իր քաղաքականությունը, հաղորդում է AFP-ն:

Ուկրաինայում ՄԱԿ-ի Մարդու իրավունքների մոնիտորինգային առաքելությունը հայտնում է, որ մայիսի 1-ից ի վեր ռուսական հարվածների հետևանքով երկրում զոհվել է առնվազն 70 խաղաղ բնակիչ, իսկ ավելի քան 500-ը ստացել են վիրավորումներ։ «Առանձնահատուկ մտահոգություն են առաջացնում ինչպես խաղաղ բնակչության շրջանում զոհերի մասշտաբները, այնպես էլ ընդամենը մի քանի օրվա ընթացքում թիրախավորված տարածքների ընդգրկումը», – հայտարարել է առաքելության ղեկավար Դանիել Բելը։ Առաքելության պաշտոնական կայքում հրապարակված հաղորդագրության մեջ թվարկված են այն հիմնական հարվածները, որոնք Ռուսաստանը հասցրել է մեկ շաբաթից էլ պակաս ժամանակահատվածում։

Մասնավորապես, մայիսի 5-ին ավիառումբերն ընկել են Զապորոժիեի արդյունաբերական թաղամասի վրա, ինչի հետևանքով զոհվել է առնվազն 12 մարդ, 46-ը՝ վիրավորվել։ Նույն օրը ավիառումբերը հարվածել են Կրամատորսկի կենտրոնին՝ խլելով առնվազն վեց մարդու կյանք, 13-ը ստացել են վիրավորումներ։

Մայիսի 1-ից շարունակվող հրթիռային և անօդաչու թռչող սարքերի բազմաթիվ հարվածների հետևանքով զոհեր և վիրավորներ կան Տերնոպոլում, Ռովնոյում, ինչպես նաև Խարկովի, Դնեպրոպետրովսկի, Խերսոնի, Պոլտավայի և Օդեսայի մարզերում։

Զեկույցում նշվում է, որ Ռուսաստանը օբյեկտներին հասցրել է կրկնակի հարվածներ, և զոհվածների ու վիրավորների թվում կան արտակարգ իրավիճակների ծառայության աշխատակիցներ և փրկարարներ։

Հյուսիսային Կորեան փոփոխություններ է կատարել երկրի Սահմանադրության մեջ՝ փաստաթղթից հանելով Հարավային Կորեայի հետ միավորման մասին բոլոր հիշատակումները։ Բացի այդ, Փհենյանն առաջին անգամ սահմանել է երկրի տարածքային սահմանները, թեև առանց հստակեցնելու, թե հատկապես որտեղով է անցնում Հարավային Կորեայի հետ սահմանը։ Փորձագետներն այս փոփոխությունները դրական են համարում։ Սահմանադրության նոր տարբերակն ունի 168 հոդված՝ բաժանված յոթ գլուխների, գրում է NK News-ը։

2-րդ հոդվածն պատմության մեջ առաջին անգամ սահմանում է պետության տարածքային սահմանները. ԿԺԴՀ-ն հյուսիսում սահմանակից է Չինաստանի Ժողովրդական Հանրապետությանը և Ռուսաստանին, իսկ հարավում՝ Կորեայի Հանրապետությանը։ Փաստաթղթում նշվում է, որ Փհենյանը «ոչ մի պարագայում չի հանդուրժի ոտնձգություններ իր տարածքի նկատմամբ»։

Մյուս կարևոր փոփոխությունը Հարավային Կորեայի հետ միավորման հիշատակումից հրաժարվելն է։ Սահմանադրության նախորդ տարբերակում 9-րդ հոդվածը սահմանում էր, որ ԿԺԴՀ-ն ձգտում է «վերամիավորել երկիրը՝ հիմնվելով անկախության, խաղաղ միավորման և մեծ ազգային միասնության սկզբունքների վրա»։

Այժմ այդ հոդվածը հանվել է Սահմանադրությունից. դրանից անհետացել են նաև նախկին առաջնորդներ Կիմ Իր Սենի և Կիմ Չեն Իրի ձեռքբերումների ու նպատակների մասին հիշատակումները։ Հենց նրանց անվան հետ էր կապվում ժողովրդի վերամիավորումը մեկ պետության մեջ։

Սահմանադրության նախորդ տարբերակում ԿԺԴՀ Պետական խորհրդի նախագահը (այդ պաշտոնը զբաղեցնում է Կիմ Չեն Ընը) անվանվում էր պետությունը ներկայացնող «գերագույն առաջնորդ», նշում է Reuters-ը, սակայն այժմ փաստաթղթում նա նշված է որպես «պետության գլուխ»։ Սահմանադրությունն առաջին անգամ պաշտոնապես պետության գլխին դասում է Գերագույն ժողովրդական ժողովից վեր, գրում է Yonhap-ը։

Սահմանադրությունը ԿԺԴՀ-ն նկարագրում է որպես «պատասխանատու միջուկային տերություն» (ինչպես և նախորդ տարբերակում) և Պետական խորհրդի նախագահին անվանում է «միջուկային ուժերի հրամանատար», ինչը նորամուծություն է։

Երևանի ավագանու «Քաղաքացիական պայմանագիր» խմբակցության ղեկավար Արմեն Գալջյանը ավագանու նիստում անդրադարձել է տրանսպորտի սակագնի փոփոխության թեմայի շահարկումներին։

«Ասում էիք 300 դրամ. մի տարի շարունակ դա էիք ասում և փորձում էիք մարդկանց համոզել, որ սակագինը 300 է դառնալու։ Վերջերս հիշեցի, որ Երևան-Աբովյան տրանսպորտը 300 դրամ է, հետո հիշեցի, որ ձեր խմբակցության կեսը Ծառուկյանի մոտ է, կեսը Քոչարյանի մաս է, մի մասն էլ ուզում էր «Մեր ձևով» գնար, բայց չստացվեց։ Այդքան խոսող եք, մարդկանց մասին մտածող եք, դուխ ունեք՝ գնացե՛ք ասեք՝ ինչո՞ւ է այդ տրանսպորտը 300 դրամ, այլ ոչ թե 100»,- ասել է Գալջյանը՝ հավելելով, որ չեն կարող այդպես ասել, քանի որ ցուցակից իրենց մեկ վայրկյանում դուրս կթողնեն։

Հունգարիայում ընտրություններում հաղթանակ տարած «Հարգանք և ազատություն» կուսակցության առաջնորդ Պետեր Մադյարը հանդես է եկել կարևոր հայտարարությամբ, որը վերաբերում է երկրի արտաքին քաղաքականությանն ու էներգետիկ անվտանգությանը։ Նա նշել է, որ Բուդապեշտը ստիպված կլինի նստել բանակցությունների սեղանի շուրջ Ռուսաստանի նախագահ Վլադիմիր Պուտինի հետ՝ հաշվի առնելով երկրի էներգետիկ կախվածությունը Ռուսաստանից։ 

Մադյարի խոսքով՝ ո՛չ Հունգարիայի, ո՛չ էլ Ռուսաստանի աշխարհագրական դիրքը չի փոխվելու, հետևաբար էներգետիկ ոլորտում առկա կախվածությունը պարտադրում է պահպանել երկխոսությունը Մոսկվայի հետ։

Միևնույն ժամանակ, Մադյարը հստակ գծել է իր կառավարության ռազմավարական առաջնահերթությունները՝ խոստանալով վերականգնել և սերտացնել համագործակցությունը Եվրամիության և ՆԱՏՕ-ի հետ։ Նա շեշտել է, որ Հունգարիայի տեղը եղել է և մնում է Եվրոպայում, և երկիրը պետք է վերադառնա իր բնականոն դաշնակցային հարաբերություններին արևմտյան գործընկերների հետ։ Այս հայտարարությունը դիտվում է որպես փորձ՝ հավասարակշռելու երկրի տնտեսական շահերը և աշխարհաքաղաքական կողմնորոշումը։

ԱՄՆ նախագահ Դոնալդ Թրամփը, պատասխանելով լրագրողների հարցերին, անտարբերություն է հայտնել Իրանի հետ բանակցային գործընթացի վերսկսման վերաբերյալ։ Խոսելով Վաշինգտոնում՝ նախագահը շեշտել է, որ իր համար էական չէ՝ երբ պաշտոնական Թեհրանը կցանկանա վերադառնալ բանակցությունների սեղան։

«Ինձ չի հետաքրքրում՝ նրանք կվերադառնան, թե ոչ։ Եթե չվերադառնան, ինձ համար դա ընդունելի է»,- նշել է Սպիտակ տան ղեկավարը՝ հավելելով, որ ԱՄՆ-ն պատրաստ է ցանկացած սցենարի։

Անդրադառնալով անցած հանգստյան օրերին փոխնախագահ Ջեյ Դի Վենսի գլխավորությամբ ընթացող բանակցություններին՝ Թրամփը հայտնել է, որ իրանական կողմը հստակ հասկացնել է տվել իր նպատակների մասին։ Ըստ նախագահի՝ Թեհրանը դեռևս ձգտում է տիրապետել միջուկային զենքի և այդ մասին բացահայտ հայտարարել է բանակցությունների ընթացքում։ 

Նախագահ Թրամփը վերահաստատել է իր վարչակազմի անփոփոխ դիրքորոշումը՝ պնդելով, որ Միացյալ Նահանգները թույլ չի տա Իրանին դառնալ միջուկային տերություն։ 

Սպասվում է, որ Իրանի Իսլամական Հանրապետությունը հինգշաբթի կպատասխանի ԱՄՆ-ի ներկայացրած հակամարտության խաղաղ կարգավորման առաջարկին, հաղորդում է CNN-ը՝ հղում անելով տարածաշրջանի խնդիրներով զբաղվող աղբյուրին։ Ավելի վաղ՝ Իրանի արտաքին գործերի նախարարության խոսնակ Էսմայիլ Բաղային հայտարարել էր, որ Իրանը ամերիկյան առաջարկի իր պատասխանը կուղարկվի Պակիստան, որը հանդես է գալիս որպես միջնորդ։

Ավելի վաղ Axios-ը հայտնել էր, որ Վաշինգտոնը և Թեհրանը մոտ են զինված հակամարտության դադարեցման վերաբերյալ մեկ էջանոց հուշագրի ստորագրմանը։ Դրանով Թեհրանը պարտավորվում է հրաժարվել ուրանի հարստացումից: Դրա դիմաց Վաշինգտոնը կվերացնի Իրանի դեմ պատժամիջոցները և թույլ կտա օգտվել արևմտյան բանկերում իրանական սառեցված միջոցներից:

Կողմերը նաև պարտավորվում են վերացնել Հորմուզի շրջափակումը։ Ըստ Axios-ի՝ մնացել է մի քանի կետ համաձայնեցնել: Իրանցի պատգամավոր Էբրահիմ Ռեզային, սակայն, հայտարարել է, որ Axios-ի հրապարակումն «ամերիկյան ցանկությունների ցուցակ» է, ոչ ավելին:

Երևանի քաղաքապետ Տիգրան Ավինյանը հանձնարարել է նախապատրաստել 170 նոր ավտոբուսի ձեռքբերման մրցույթ։ Նրա խոսքով՝ այդ նոր ավտոբուսները կգան փոխարինելու «Higer»-ներին և «Գազել»-ներին։

Նա շեշտել է. «Բայց այս մրցույթը պայմանով, այսինքն՝ առանց ֆինանսական միջոցների կհայտարարենք, և հավաքագրումներից կախված կորոշենք՝ գնում իրականացնում ենք, թե ոչ։ Մենք տեսնում ենք, որ կա ահռելի պոտենցիալ՝ վճարումներն ու կարգուկանոնը ճիշտ տրամաբանության բերելու դեպքում ֆինանսական միջոցներ գեներացնել ու այս տարի ևս մեծ խմբաքանակ ավտոբուսներ ձեռք բերել, բոլոր «Higer»-ներն ու «Գազել»-ները փոխարինել։ Բայց այստեղ կարևոր է, թե մեր գործընկերներն ինչպես կաշխատեն, կարգապահությունը ինչպես կվերահսկեն»։

Քաղաքապետը հիշեցրել է, որ մեկ շաբաթում տրանսպորտում ուղեվարձի ուժեղացված վերահսկողության արդյունքում հավաքագրել են 3 ավտոբուսի գումար։

Ավելի վաղ քաղաքապետն ասել էր. «Շաբաթական մոտ 70-80 մլն դրամի չվճարում ունենք։ Սա նշանակում է, որ շաբաթը երկու նոր ավտոբուս կարող էինք գնել այդ չվճարողների հաշվին»։