Նախագահ Դոնալդ Թրամփը 90 օրով երկարաձգել է այն թույլտվության գործողությունը, որը օտար դրոշով նավերին թույլ է տալիս նավթ և այլ հումքային ապրանքներ տեղափոխել ԱՄՆ նավահանգիստների միջև, սակայն սահմանել է նոր սահմանափակումներ այն բանից հետո, երբ նավաշինարարները և Կոնգրեսում նրանց աջակիցները հայտարարել են, որ այդ քաղաքականությունը վնասում է երկրի ծովային ոլորտին, հայտնել է Սպիտակ տունը։
Երկարաձգումը տեղի է ունենում այն պայմաններում, երբ Իրանի հետ պատերազմը խաթարում է հում նավթի համաշխարհային հոսքերը և հանգեցնում է վառելիքի գների աճի, ինչը մեծացնում է ճնշումը վարչակազմի վրա՝ որոնելու ուղիներ՝ տրանսպորտային «խցանումները» մեղմելու և բենզինի ու այլ էներգակիրների գների հետագա աճը թույլ չտալու համար։
90-օրյա երկարաձգումը երաշխավորում է, որ ամերիկյան զինված ուժերը և առանցքային ճյուղերը կպահպանեն անխափան հասանելիությունը կենսականորեն կարևոր ռեսուրսներին, երկուշաբթի հայտարարել է Սպիտակ տան պաշտոնական ներկայացուցիչ Թեյլոր Ռոջերսը։
«Տվյալները ցույց են տալիս, որ այդ թույլտվությունը հանգեցրել է ներքին մատակարարումների զգալի աճի այնպիսի կենսական կարևորության ապրանքների համար, ինչպիսիք են բենզինը, դիզելային վառելիքը և ավիացիոն կերոսինը»,- գրել է Ռոջերսը X սոցիալական ցանցում։
Ըստ Սպիտակ տան ներկայացուցչի՝ նոր պայմանների շրջանակում վարչակազմը նեղացրել է մեղմացումների կիրառման շրջանակը՝ պահանջելով յուրաքանչյուր ուղերթի անհատական ստուգում, փոխարենը օտար նավերին Ջոնսի օրենքից ընդհանուր բացառություններ ստանալու թույլտվություն տալու։
Ջոնսի օրենքը պահանջում է, որպեսզի ԱՄՆ նավահանգիստների միջև տեղափոխվող բեռները փոխադրվեն ԱՄՆ-ում կառուցված, ամերիկյան ընկերություններին պատկանող և ամերիկյան անձնակազմերով համալրված նավերով։ Այդ թույլտվության նպատակընավագնացության ճկունության բարձրացման և տրանսպորտային խցանումների կրճատման միջոցով բենզինի գների նվազեցումն է։
Թույլտվության ժամկետը լրանալու էր օգոստոսի 16-ին։ Դա ավելի քան մեկ դար առաջ ընդունված օրենքի կասեցման ամենաերկարատև դեպքն է նրա ամբողջ պատմության ընթացքում։