Author: Julbaz

ԱՄՆ նախագահի անունը մտադիր են հանել Օտտավայի Թրամփ-ավենյուի անվանումից՝ Միացյալ Նահանգների և Կանադայի միջև առևտրային պատերազմի սրման ֆոնին։ ԱՄՆ նախագահի անունը փողոցի անվանումից հեռացնելու նախաձեռնությունը կգլխավորի Օտտավայի քաղաքային խորհրդի անդամ Ռայլի Բրոքինգթոնը։ Այս մասին հայտնել է CTV News հեռուստաալիքը։

«Ես ամաչում եմ, որ քաղաքի թաղամասերից մեկում կա փողոց, որը կոչվում է Թրամփ-ավենյու։ Եվ ես ամաչում եմ, որ մեր երկրի մայրաքաղաքում այդ կերպ հարգանք են ցուցաբերում Դոնալդ Թրամփին», – հայտնել է Բրոքինգթոնը քաղաքային խորհրդի նիստում։ Քաղաքական գործիչը հավելել է, որ քաղաքային խորհրդի նոր կազմի աշխատանքի մեկնարկից հետո ինքն անձամբ կգլխավորի փողոցի վերանվանման գործընթացը՝ Թրամփ-ավենյուի բնակիչների հետ համատեղ։ Հեռուստաալիքի նշմամբ՝ քաղաքի կանոնակարգի համաձայն, անվանումը փոխելու համար պահանջվում է բնակիչների առնվազն 50 տոկոսի համաձայնությունը և ևս մեկ լրացուցիչ ձայն։

Օտտավայի քաղաքապետ Մարկ Սաթքլիֆի խոսքով՝ փողոցի վերանվանումը կապված է «մեծ թվով դժվարությունների» հետ, քանի որ բնակիչները ստիպված կլինեն փոխել բոլոր փաստաթղթերը, որոնցում նշված է բնակության հասցեն։ Քաղաքապետը նշել է, որ չի ցանկանում, որպեսզի «Օտտավայում որևէ բան կոչվի Դոնալդ Թրամփի պատվին», սակայն վերջնական որոշումը Թրամփ-ավենյուում բնակվող քաղաքացիներինն է։ Ընդհանուր առմամբ այդ փողոցում գտնվում է 62 տուն։

Օգոստոսի 25-ին ԱՄՆ նախագահ Դոնալդ Թրամփը հայտարարել էր, որ Օնտարիո լիճը կարող է վերանվանվել Ամերիկա լիճ։ Բացի այդ, օգոստոսի 22-ից ուժի մեջ են մտել կանադական որոշ ապրանքների կատեգորիաների նկատմամբ ամերիկյան 50 տոկոսանոց ներմուծման մաքսատուրքերը։ Կանադայի վարչապետ Մարկ Քարնին հաստատել է, որ որոշում է ընդունել կասեցնել ԱՄՆ-ի հետ առևտրային բանակցությունները։ Նա նշել է, որ Օտտավան կսահմանի պատասխան մաքսատուրքեր։ Նախատեսվում է, որ դրանք ուժի մեջ կմտնեն սեպտեմբերի 8-ին։ Միևնույն ժամանակ, Քարնին ընդգծել է, որ ԱՄՆ-ի և Կանադայի միջև սկսվել է «առևտրային պատերազմ»։ Նրա կարծիքով՝ այն նախաձեռնել է Վաշինգտոնը։

Երկարատև երաշտի, ծայրահեղ շոգի, կեղևակեր բզեզների թվաքանակի աճի և ծառերի շրջանում հիվանդությունների տարածման համադրությունը Եվրոպայում հանգեցնում է անտառների աննախադեպ չորացման։ Այս մասին նշվել է ՄԱԿ Եվրոպական տնտեսական հանձնաժողովի (ՄԱԿ ԵՏՀ) հայտարարության մեջ։

«Երկարատև երաշտի, ծայրահեղ շոգի, անտառային հրդեհների վտանգի, կեղևակեր բզեզների թվաքանակի աճի և անտառային ծառերի շրջանում հիվանդությունների տարածման համադրությունը տարածաշրջանում հանգեցնում է անտառների աննախադեպ չորացման»,- նշվել է տեքստում։

Նշվել է, որ Արևմտյան և Կենտրոնական Եվրոպայում տեղի են ունենում լայնածավալ տերևաթափություն և անտառածածկի վնասում՝ տեղումների զգալի պակասի ֆոնին, որն առանձին շրջաններում ավելի քան վեց տասնամյակի ընթացքում եղել է ամենաերկարատևն ու կայունը։ Հանձնաժողովի տվյալներով՝ միջատները, հիվանդությունները և եղանակային երևույթները տարածաշրջանում ամեն տարի վնասում են մինչև 73 մլն հա անտառ։

ՄԱԿ ԵՏՀ-ում ընդգծել են, որ տարածաշրջանի քաղաքային ծառերը նույնպես տուժում են ուժեղ շոգից և ջրի պակասից, ինչը վտանգ է ստեղծում կլիմայի փոփոխության հետևանքներից քաղաքների պաշտպանության, օդի որակի և բնակչության բարեկեցության համար։

Հունիսի երկրորդ կեսին Եվրոպան բախվել է ծայրահեղ շոգ եղանակի։ Արևմտյան Եվրոպայի երկրներում ջերմաչափի սյունը բարձրացել է 40 աստիճանից բարձր։ Հուլիսի 9-ին Երկրի հեռահար զոնդավորման և քարտեզագրման եվրոպական Copernicus ծառայությունը հաստատել է, որ անցած հունիսը դարձել է օդերևութաբանական դիտարկումների ողջ պատմության ընթացքում ամենաշոգը՝ երկրի մակերևույթի մոտ օդի միջին ջերմաստիճանը կազմել է 20,74 աստիճան։ Financial Times թերթի տվյալներով՝ Եվրամիության երկրների ծախսերը անտառային հրդեհների դեմ պայքարի համար, որոնք ընդգրկել են Ֆրանսիան, Իսպանիան և Եվրոպայի այլ հատվածներ, այս տարի արդեն զգալիորեն գերազանցել են 3 մլրդ եվրոն։